முகவரி தொலைத்த முகங்கள்..

முகவரி தொலைத்த முகங்கள்..

* வானம் போர்த்திய 
பூமிக்குள்..
பலகோடி 
சாயம் பூசிய போலி
முகங்கள்....

* முகவரி  தந்த  தாயிடம் கடிந்து கொண்டு ,
முகவரி இல்லா இணைய 
நட்பிடம் சிரித்து சிரித்து 
பேசும் சில முகங்கள்..

* தங்கையின் வேண்டுகோளை 
நிராகரித்து, எதிர்வீட்டு நங்கைக்காய் 
காத்துகிடக்கும் சில முகங்கள்..

* நலம் விசாரிப்பதாய் தொடங்கி 
நண்பனின் சட்டைப்பையில் 
ஒளிந்து கிடக்கும் சில முகங்கள்..

* உள்ளொன்று வைத்து,
புறம்தனில் இனிக்க இனிக்க 
பேசி கழுத்தறுக்கும் 
சில முகங்கள்...

* பிறர்  உணர்வுகளை புரியாமல், 
உள்ளம் கொள்ளும் சில முகங்கள் 

* காதலை வகைப்படுத்தி,
நாகரிகப்பெயர்சொல்லி 
இளமையை தொலைக்கும் 
சிலமுகங்கள்...

* விடியலில் கட்டிய மனைவியிடம்
கர்ஜனை செய்து விட்டு, 
பெட்டிப் பாம்பைப் போல் 
 பிறர் பேச்சுக்குள் அடங்கிப் போகும் 
சில முகங்கள்...

* சிரிக்க மறந்து, சிந்திக்க மறந்து 
பிறர் உணர்வு மறந்து 
தன் சுயம் எதுவென்று 
அறியாத சில முகங்கள் 

* சுற்றியுள்ள சமூகம்
வித விதமாய் நமைமாற்ற
நம் சுயம் மாறவும் முடியாமல்,
மீளவும் முடியாமல்,
போட்ட சாயத்தில் ஒன்றிப்போன
முகங்கள்


* வெளியில் ஒரு முகம்,
வீட்டில் ஒரு முகம்மென,
மாறிமாறி,
தன் முகம்
எதுவென தானே அறியாமல்
தன் முகவரி தானே
தொலைத்த முகங்கள்...


* வானம் போர்த்திய
பூமிக்குள்..
பலகோடி 
சாயம் பூசிய போலி
முகங்கள்....